Amasa in hiai website nei thei ding a honpi i biak Pathian min ka phat a, hiai website vehtute chibai ka hon buk hi.
Hiai website kei a kia hilou in i vek ua i neihkhawm ding ua kibawl ahi chih ka hon gen nuam a, Pathian panpihna leh noute huhna toh, hiai website a paitouh zel ka um hi.
Website Hong Kibawlna San:
Laa lam a makaihna kum 30 sung a ka tuah haksa mahmah tuh laa gelh zon leh soundtrack bawl ahi, tua haksatna midang ten leng tuak sam ding chih ka theihna in hiai website bawl ding lunggulhna hon pia hi.
Pathian in Laa hon piakte tungtawn a Amah min thupina ding leh, mi khempeuh lagelh, soundtrack, mp3, mp4 baihlamtak a a ngah theihna ding leh, tua laate tungtawn a khalam vualzawlna ahihtheihna ding ngimna toh bawl khiak ahi.
Mimal Kipulakna:
Ka Pa T. Phungzachin, leh Ka Nu Jamchong te gil a gah goutan 11te lak ah a 8na ding in, August 11, 1969 in Khua neuchik, inn 35 vel tenna P. Munlian (Va-ngaitang) khua ah ka hong piang khia hi. Neuchik ka hih a pan music leh laphuah a lunglut mi ka hi a, 1987 kum in khalam pianthakna ngah in tua hun a pan Gospel laa ka hon phuak pan a, 2017 kum tan ah laa 100val Toupan hon peta a, hon pelai ding chih upna toh Amah min ka phat hi.
Innkuan khosakna lam ah Ka zi Mankhanmuan toh Sept. 1, 2006 in, EBC Church Bungmual (Lamka) ah Pathian Dansiangthou in Pastor H. Jamkhanpau in hon kiteng sak a, tu in ta numei thum, Donthiansiam Tonsing, Ningnunnem Tonsing, Haungaihsang Tonsing te toh ka khosa lel uhi.
Laphuah leh lalam toh kisai Gospel ministry khat hi a ngai in nasep pipen in ka nei hi.
Toupan Amah late tungtawn in hon vualzawl chiat hen aw.
Ka Kipak,
Pumkhothang Tonsing
Phone: +91-9436 44 9987
